top of page

SEJĦA GĦALL-ESPRESSJONI TA’ INTERESS GĦALL-KITBA, PRODUZZJONI U PREŻENTAZZJONI TAL-QARĊILLA WAQT L-ATTIVITAJIET TAL-KARNIVAL 2025

festivalsmalta

Updated: Oct 11, 2024

Festivals Malta qed tilqa’ proposti ta’ interess għall-kitba, produzzjoni, preżentazzjoni u eżekuzzjoni tal-qarċilla waqt l-attivitajiet tal-Karnival 2025.

Il-Qarċilla hi produzzjoni teatrali “tat-triq” satirika li kienet sinonima fost

l-attivitajiet tal-Karnival li kienu jsiru f’pajjiżna fil-passat.


Mill-2014, il-programm tal-Karnival reġa’ beda jintegra din il-forma ta’ teatru tat-triq tradizzjonali fil-programm tal-Karnival. Għalhekk hu mistenni li min jitħajjar jippreżenta tali rappreżentazzjoni jkun għamel ir-riċerka neċessarja biex kemm l-awtur, id-direttur u l-artisti jkollhom għarfien dwar it-tradizzjoni ta’ tali rappreżentazzjoni u tali jiġi rifless fil-preżentazzjoni li tkun maħsuba biex tittella’.

Il-Qarċilla tikkonsisti f’kitba satirika bil-Malti li tieħu struttura ta’ kuntratt ta’ negozjar għad-dota.


Fiha tipikament ikunu involuti għarusa u għarus flimkien ma’ nutar waqt il-kitba taż-żwieġ. Il-kitba jkollha elementi satiriċi b’suġġetti kontemporanji fuq dak li jkun qed jiġri fil-pajjiż u l-madwar. 


Dawk interessati li jtellgħu din il-produzzjoni għandhom jibgħatu l-proposta tagħhom u jinkludu dan li ġej:

  1. idea tal-iscript/kunċett;

  2. pjan għall-preżentazzjoni ta’ dan ix-xogħol teatrali;

  3. dettalji dwar l-atturi, id-direttur eċċ.; 

  4. lista tal-kontenut mużikali; u

  5. pjan ta’ implimentazzjoni għal din il-produzzjoni, inkluż kwalunkwe talba għall-ħlas u budget.


Hu mistenni li l-Qarċilla tittella’ fl-apert fi Triq l-Ordinanza, il-Belt Valletta fil-jiem tal-Karnival, bi produzzjoni kull siegħa waqt l-attivitajiet tal-Karnival tas-Sibt u l-Ħadd wara nofsinhar (allura bejn is-2 pm u s-7pm)


Għall-preżentazzjoni tal-Qarċilla fit-triq Festivals Malta se tipprovdi dawl (floodlighting tal-area) u sistema tas-sound li tinkludi dan li jidher hawn taħt:-

Public Address System

Public Address System adekwata b’żewġ self-amplified speakers  u l-mikrofoni neċessarji għal rappreżentazzjoni ta’ dan l-istil (ċ. 12-il mikrofonu headset cordless u 6  mikrofoni wired) flimkien ma’ mixer u equipment ieħor neċessarju. 

Floodlights

Żewġ stands li jinkludu erba’ floodlights ta’ 1000W jew l-ekwivalenti tagħhom għar-rappreżentazzjoni fil-post tal-ispettaklu fi Triq l-Ordinanza. 


Jekk huwa meħtieġ, Festivals Malta wkoll tipprovdi sa 12-il crowd control barriers.   Kwalunkwe materjal ieħor meħtieg għall-eżekuzzjoni tal-rappreżentazzjoni jrid jiġi pprovdut mill-persuna responsabbli biex tittella’ tali rappreżentazzjoni. 

Barra minn dan, ikun mistenni li bi ftehim ma’ Spazju Kreattiv din il-produzzjoni tittella’ f’żewġ jew tlett serati apposta hekk kif maqbula bejn il-partijiet konċernati (fejn meħtieġ b’modifika sabiex tkun addatata għall-ambjent ġewwa t-teatru).


Il-produzzjoni tal-Qarċilla tista’ tittella’ f’postijiet oħra minbarra dawk imsemmija hawn fuq dment li f’kull ċirkustanza jiġi msemmi li din il-produzzjoni hi mtella’ għal u megħjuna minn Festivals Malta.   


Is-sottomissjonijiet ta’ espressjoni ta’ interess għall-kitba, produzzjoni u preżentazzjoni tal-Qarċilla waqt l-Attivitajiet tal-Karnival 2025 għandha ssir permezz ta’ email li tintbagħat fuq info.fm@festivals.mt sa mhux aktar tard minn nofsinhar ta’ nhar il-Ġimgħa 18 ta’ Ottubru, 2024.


Dawk interessati li jibgħatu l-proposta tagħhom għandhom jaċċertaw li huma reġistrati mad-Dipartiment tal-VAT u għandhom numru tal-VAT. 

Comments


bottom of page