Sa mit-tnedija tiegħu fl-2013, il-Valletta Baroque Festival dejjem offra avveniment uniku lill-udjenzi tiegħu li fih uħud mill-aqwa solisti u ensembles fix-xena mużikali barokka. Imtella' fuq tliet ġimgħat, il-festival joffri esperjenza kwintissenzjali ta’ dak kollu li hu Barokk hekk kif iseħħ f’postijiet mill-isbaħ bħall-Kon-Katidral ta’ San Ġwann, il-Palazz Verdala, Palazzo Parisio, u t-Teatru Manoel biex insemmu xi ftit. Dawn il-postijiet huma spazji Barokki awtentiċi mżejna b’dekorazzjonijiet, skulturi u pitturi lussużi li huma tipiċi ta’ dan il-perjodu. Organizzat minn Festivals Malta kull Jannar, taħt id-direzzjoni artistika ta’ Kenneth Zammit Tabona, il-festival jenfasizza l-versatilità tal-idjoma barokka u l-appell tagħha għall-massa. Fuq kollox, is-saħħa tal-festival tinsab fl-ambjenti barokki meraviljużi li wieħed isib fil-Belt Valletta u fl-arċipelagu Malti; wirt prezzjuż li kull wieħed u waħda minna l-Maltin ngħożżu.