Minn Ritmu għal Festgħana: Pjattaforma għall-Għana li Ser Tiffoka fuq l-Għeruq Maltin

Festivals Malta qed tħabbar dehra u isem ġdid għal dak li kien Ritmu Roots Festival. Mill-21 sal-24 ta’ Mejju tal-2026, Festivals Malta ser tkun qed tniedi l-ewwel edizzjoni ta’ dan il-festival taħt l-isem Festgħana, festival bl-għeruq u x-xniexel.

Din id-deċiżjoni biex il-festival jieħu sfumatura differenti ttieħdet wara taħditiet mal-membri tal-komunità tal-għana u wkoll nies li kienu involuti fit-tħejjija ta’ dak li kien il-festival Għanafest, riċerkaturi fil-qasam tal-folklor u t-tradizzjonijiet Maltin, u nies li matul is-snin, iddedikaw ħajjithom għall-preservazzjoni u l-promozzjoni tal-għana Maltija.  Dan qed isir bl-għan li t-tradizzjoni tal-għana mhux biss tkun apprezzata, imma tingħata pjattaforma nazzjonali siewja sabiex tingħata l-attenzjoni li jistħoqilha.

Din il-bidla minn Ritmu Roots Festival għal Festgħana timmarka wkoll l-ewwel sena tal-festival taħt id-direzzjoni ta’ Prof. Toni Sant. Il-festival li ser ikollu dehra differenti, ser ikollu wkoll għadd ta’ attivitajiet matul is-sena marbutin mal-għana lil hinn mill-attivitajiet prinċipali fl-Argotti f’Mejju sabiex titwassal l-għana fil-komunitajiet ukoll. Dawn qed isiru b’kollaborazzjoni ma’ membri tal-komunità tal-għana, NGOs u kunsilli lokali.

Ritratt ta' Prof. Toni Sant, Direttur Artistiku ta' Festgħana meħud minn Jean Marc Zerafa

Prof. Sant huwa riċerkatur lil għandu esperjenza estensiva fir-riċerka tal-mużika Maltija. Huwa l-President u wieħed mill-Fundaturi tal-Fondazzjoni M3P, organizzazzjoni li tiddokumenta u tippromovi l-għarfien dwar il-mużika Maltija, kien id-Direttur Artistiku ta’ Spazju Kreattiv, iċ-Ċentru Nazzjonali tal-Kreattività, mill-2014 sal-2020, u huwa Professur tal-kurazzjoni diġitali fi ħdan l-Università ta’ Salford.

Hu u jikkummenta dwar il-bidliet sinifikanti u l-pjan li qed jitfassal għal Festgħana, Prof. Sant qal li "Festgħana huwa ċelebrazzjoni ta’ wirt l-għana Malti b’opportunità biex titrawwem ġenerazzjoni ġdida ta’ għannejja u daqqaqa. ⁠Huwa essenzjali li niċċelebraw ukoll l-inklużjoni tal-għana fil-lista ta’ wirt kulturali intanġibbli mill-UNESCO għax dan jgħin biex din l-espressjoni kreattiva tradizzjonali tkun apprezzata ukoll fil-kuntest globali”.

Biex issegwu aktar dwar Festgħana u żviluppi marbuta ma’ dan il-festival, żuru l-paġni ta’ Festgħana fuq Facebook u Instagram. Festgħana huwa organizzat minn Festivals Malta bis-sapport tal-Ministeru għall-Kultura, l-Artijiet u l-Gvern Lokali.